Gujarati News

રાજકોટ તા. ૧૬: ગોંડલના વેકરી ગામ નજીક રાત્રીના દસેક વાગ્યે છકડો રિક્ષા પલ્ટી મારી જતાં ચાલક વેકરીના મનસુખભાઇ ભીખાભાઇ બગડા (વણકર) (ઉ.વ.૩૮)નું ગંભીર ઇજા થતાં મોત નિપજ્યું છે.

મનસુખભાઇ છકડો રિક્ષાના ફેરા કરી ગુજરાન ચલાવતાં હતાં. રાત્રે શાપર વેરાવળ ખાતે માલસામાનનો ફેરો નાંખી પરત પોતાના ગામ આવી રહ્યા હતાં ત્યારે રસ્તામાં બનાવ બન્યો હતો. ગંભીર ઇજા થતાં રાજકોટ સિવિલ હોસ્પિટલમાં ખસેડાયા હતાં. પરંતુ અહિ સવારે મોત નિપજ્યું હતું. બનાવથી પરિવારમાં ગમગીની છવાઇ ગઇ હતી. મૃતક ત્રણ બહેનના એકના એક ભાઇ અને પરિવારનો આધાર સ્તંભ હતાં. હોસ્પિટલ ચોકીના વાલજીભાઇ નિનામા અને રામજીભાઇ પટેલે જરૂરી કાર્યવાહી કરી ગોંડલ તાલુકા પોલીસને જાણ કરી હતી.